今日唔能够攻抵22000大关,好友当然系唔收货,全日成交再缩一缩去到463亿银。 *偏软牛牛皮真闷亲隔离,百丽最美丽QQ唔靓仔* 今日大部分大只佬都无乜走势可言,好似三只大价股大象(00005)、中移(00941)同埋港所(00388),全部都系窄幅波动,收市就各跌0﹒1巴仙至0﹒7巴仙。 跌得最多大只佬要算系正在转弱势嘅QQ(00700),但埋单亦只不过系唔见1﹒6巴仙。另外上星期喺自己公司刊物到刊登经营情况嘅剧飞(00293),今日继续飞低,唔见0﹒9巴仙。, 升势亮丽嘅大只佬就有百丽(01880),上星期已经见到佢唔声唔声突破阻力位,今日就再进一步,踢高3巴仙埋单。瑞信报告就将百丽列为祖国消费股嘅首选,指佢地10月份嘅鞋仔销售温和回升。 *前度揸重货大美人反覆,JOYCE包浩斯股价同闭翳* 大只佬嘅焦点落喺大美人(00330)身上。大美人喺上星期五收市后公布供股结果,公司前主席邢李?手揸嘅股权已经超过10%,成为公司第二大股东。有啲缸友一听到竟然觉得唔太乐观,落力沽货,令到今朝大美人曾经跌过接近4巴仙。 势估唔到好友突然发难狂夹淡仓,大举扫货,大美人好快调头抽升,之后夹淡威力加大,令大美人曾经倒升超过一成,最后散场大美人只系踢高2﹒8巴仙,系今日最强悍嘅大只佬。虽然大美人今日觉得好high,但系卖衫族并唔系个个都咁高兴。JOYCE(00647)今年中期赚少足足58%,另一间包浩斯(00483)中期亦都少赚32%,两间公司畀缸友狂沽货,最后包JOYCE同浩斯埋单唔见5﹒1巴仙及10﹒9巴仙。 *翠华有交代一手赚几餐,两只快餐股同样有苗头* 睇完着衫股就睇返食得落肚嘅股份。今日鱼缸最瞩目嘅就系「茶餐厅」翠华(01314)第一日挂牌。呢间知名度算系最高嘅香江茶餐厅,吸引唔少缸友入飞,公开发售就超购近12倍,一开市就已经高过招股价近一成,之后缸友就好似抢住食佢地嘅驰名奶油猪咁系咁抢货,一度升过去2﹒68银,收市就报2﹒56银,高招股价12﹒8巴仙,一手唔计手续费净袋580蚊,够去翠华食返十餐八餐。 唔止翠华有好表现,就连两只快餐股大家乐(00341)同大快活(00052)都乘势而炒上。大家乐老板陈裕光之前讲到最低工资系洪水猛兽咁款,点知份上半年业绩就「为你做足100分」,半年盈利2﹒21亿银,按年升15﹒9%,快餐嘅同店销售较去年同期增加7%,整体毛利率亦由11﹒8%上升至12﹒6%,股价涨1巴仙埋单。 至于明日发业绩嘅大快活抢得更高,大涨4﹒1巴仙埋单,真系「升得够尖大快活」! *瑞信来祝福东风踩行油,缸友齐埋镬炒?页岩气* A仔场偏软,喺酿酒股继续受到塑化剂事件影响之下,A仔全日唔见近半巴仙。虽然A仔表现麻麻,不过中字派有几件板块就仍然系炒个不亦乐乎。车仔股之中嘅东风(00489)表现就非常突出,事关瑞信指东风联营嘅日产车仔同本田车仔都销量反弹。瑞信仲话,东风嘅日产车仔形象比对手现代车仔好,而如果东风将日产车仔售价拉近现代车仔,好有机会抢到对手嘅市占。瑞信仲认为,而家市场对运动型多用途车需求好大,东风日产下年首季话唔定可以食到个势,销量强力复苏,东风升足8﹒3巴仙散场。而一样有日资联营嘅广汽(02238)亦弹高2﹒6巴仙先走人。 页岩气概念股炒完之后休息一轮,储够力水今日就继续炒作,安东油服(03337)接到中石化嘅订单,今日弹高11﹒5巴仙,仲创出五年新高;中油燃气(00603)同华油能源(01251)各弹高8﹒5仙及5﹒1巴仙。 *花旗来唱淡水泥打倒褪,股仔要捱沽天娇要穿底* 水泥股今日就全线回吐,花旗最新有报告就唱淡水泥族,特别系札根广东嘅华润水泥(01313),因为供需关系恶化,仲叫缸友强力沽售。润泥全日跌1﹒7巴仙,中建材(03323)同海螺(00914)分别唔见1﹒5巴仙及1﹒4巴仙。 尾市就见到有啲电讯设备股录得大幅回吐,京通(02342)全日埋单急泻10﹒5巴仙,拖累埋中国无线(02369)同中兴(00763)都唔见3﹒3巴仙及1﹒9巴仙。 银基(00886)呢只五粮液代理亦都唔好过;有传媒就上深圳探查,仲话唔少银基嘅分店已经……只股今日散场跌8﹒6巴仙。上星期五挂牌表现唔错嘅卡撒天娇(02223),今日就跌穿招股价,散场唔见10﹒4巴仙。请请! |
|
||
|